إفريقي ف باريس تحول لبطل .. عتق جيرانو من الموت وخرجهم من وسط العافية (فيديو)

وكالات//

واحد الراجل عرض حياتو للخطر باش ينقذ دراري صغار فواحد الشقة مجاورة لدارو، من واحد العافية شعلات فيها، وهذا الشي وسط باريس العاصمة الفرنسية. هاد السيد كان شاد فراسو بين جوج شراجم على علو 6 طوابق.

الواقعة وقعات فالدائرة 18 فالمدينة، وفيديو صور هادشي، كيبين فوسيني سيسوكو، لي ساكن فهذيك العمارة، وهو واقف فواحد البلاصة ضيقة بين الشرجم ديالو والشرجم ديال الشقة الجارة لي شاعلة فيها العافية، باش ينقذ الدراري لي كانو محاصرين داخل الدار لي كانت العافية كتاكل فيها.

قال سيسوكو لوسائل الإعلام الفرنسية: “ملي شفت جيراني محاصرين وكيغوتو بالخلعة، ما ترددت حتى شوية. قفزت من الشرجم ديالي ولقيت بلاصة نحط فيها رجلي، عاد ثبت راسي وبديت كندوز الدراري واحد بواحد”.

اللقطات ديال الفيديو بينات سيسوكو كيتصرف بهدوء وحذر واخا الموقف كان خطير بزاف، على بعد سنتيمترات قليلة من الحافة ديال العمارة، وهو كيهز الدراري من شرجم لشرجم آخر، وسط الدخان والعافية.