الزيات عقدة آيت منا رجع.. عودة الرئيس الرجاوي بالديمقراطية وببرنامج واضح أكبر خطر على لملايري ولد لفشوش فالوداد والوداديين الاحرار ما غايصبروش عليه 

مصطفى الشاذلي گود سبور//

تعتبر عودة جواد الزيات لرئاسة الرجاء الرياضي، والانتخاب ديالو بطريقة ديمقراطية بصناديق الاقتراع خلال جمع عام تاريخي ماشي غير فالرجا ولكن تاريخي بالنسبة لگاع الأندية الوطنية والكورة المغربية، (تعتبر) ضربة قوية ماشي لهذاك اللوبي ديال التسيير التقليدي فالخضرا اللي صافي حط السلاح واستسلم لمعسكر العلم، ولكن ضربة قوية لگاع وجوه التسيير التقليدي فالأندية المغربية وعلى رأسهم هشام آيت منا رئيس الغريم التقليدي الوداد الرياضي.

انتخابات الرجاء الرئاسية والديمقراطية اللي عرفها الجمع العام الأخير، واللي طلع فيها جواد الزيات رئيس جديد بعد منافسة مع 2 مرشحين (عبد الله بيرواين وسعيد حسبان) وامتداد هذا التنافس لجولتين وسط جمع عام وصل لـ9 السوايع وأمام أنظار المغاربة كاملين وماشي غير الرجاويين، فهاذ الشي خلى المنتمين لباقي الأندية المغربية منخرطين وجماهير يحسو بقيمة الديمقراطية اللي كاينة فالرجا وما عندهمش هما فالأندية ديالهم وهذا واقع، حيث أغلب رؤساء الأندية فالكورة المغربية كايطلعو بالتزكية والتوافقات، وطبعا هاذ الإحساس بالديمقراطية والشفافية راه كايشكل خطر وتهديد على هاد الرؤساء وأولهم هشام آيت منا الرئيس العرباز، اللي طلع رئيس للوداد كمطلب من الجمهور بعدما وعدهم بالكذوب، وفاللخر خرّج الفريق فالحيط.

بروفايل جواد الزيات كعقل واعر فالتدبير المالي والتخطيط المؤسساتي ومسير رياضي ناجح بناء على تجربتين سابقتين مهمتين فالرجا أولهم فالمكتب ديال الرئيس الأسبق غلام قبل نحو 15 عام، والتجربة الثانية كرئيس للرجا نجح فبناء قاعدة رياضية داخل النادي والمساهمة فإخراجو من الأزمة اللي كان فيها عام 2018، ودابا الرجوع ديالو للخضرا ضمن مشروع رياضي فمرحلة جديدة كأول نادي يتحول بشكل فعلي من إطار الجمعية إلى تسيير الشركة الرياضية بشراكة مع “مرسى ماروك”، هذا الشي كايشكل خطر كبير على مستقبل هشام آيت منا رئيس الوداد الرياضي، حيث ما يمكنش الوداديين الحرار يشوفو فريقهم كايغرق فالأزمة مع رئيس فاشل وعندو طريقة عشوائية فالتسيير، والمصيبة بلا ألقاب، وف المقابل كايشوفو الغريم ديالهم الرجا خدامين مع رئيس كلاس وعندو بروفايل ناجح، قدر يصنع لراسو اسم فعالم التسيير والتدبير المالي قبل ما ينجح ويقود الرجا لتحقيق الاستقرار المالي والنجاح الرياضي، ودابا راجع بقوة باش يقود برنامج لتحقيق إقلاع بالنادي ويكون الطوب أفريقيا.

الوداديين واخا مختالفين مع الرجاويين فالانتماء، وواخا بيناتهم هاديك الحزازات والكلاشات وهاداك الشدان، ولكن راه أغلبهم عارفين أن جواد الزيات عندو قدرة باش يأفونصي بالرجا ويزيد بها القدام، وحاسين بالخطر اللي كايهدد الحمرا حيث الرجا غريم والتتويج ديالو بالألقاب معناه فشل الوداد، وعارفين حقيقة أن هشام آيت منا إلى بقى فالوداد، الحمرا غاتغرق وغايوليو يشوفو الرجا هربانين عليهم ماليا وحتى من ناحية التتويجات بحال واقع الأهلي والزمالك فمصر، حيث الواقع هو أن البرنامج اللي مخطط له الزيات والمكتب اللي معه راه ناويين يخليو الرجا الطوب فلافريك وماشي غير محليا، وف المقابل مازال آيت منا غارق فالعشوائية والطيش ديالو الخاوي، والدليل أنه مشى يجري يوقع مع عبد الغفور لاميرات اللاعب المسفيوي اللي خلاوه الرجا وما بقاوش باغيين يسنيو معه، وهو مصور معاه زعما راه دار شي حاجة خارقة ملي سنا معاه، والصراحة راه بان بحال عزيز البدراوي الرئيس السابق للرجا، ودابا ولاو الوداد كايبانو بأنه يالاه وصلو لهادوك الأغلاط اللي طاحو فيهم الرجاويين قبل منهم، ملي جابو رئيس من خارج المنظومة الرجاوية ما فاهم والو فالكورة، وهذا الفيلم نفسو كايتعاود مع ولد فضالة اللي حالف حتى يرجع الوداد بحال شباب المحمدية اللي غرقها وطاحت للدوزيام ديفيزيون بسبابو.

وللإشارة فمن غير الكاريزما والعقل والرزانة اللي عند جواد الزيات والخدمة بالتخطيط والبرامج، وهذا الشي اللي ما كاينش عند الملايري ولد لفشوش ايت منا، واللي واخا يبغي يشريه ما يلقاهش حيث ما كايتباعش، راه ولد فضالة معقدو جواد الزيات بزاف، وهذا الشي من ايام ما رفض الرئيس الرجاوي يتعامل معه ملي بغى يبدا يسمسر فشي لاعبين يحطهم فالرجا بعقود إعارة من شباب المحمدية اللي كانت فالهواة، وملي قمعو الزيات وقاله راه الرجا هادي الفريق الكبير والعريق ما يمكنش ياخد لاعبين إعارة من فريق فالهواة، وهو معقد من الرئيس الرجاوي ومن الرجا والرجاويين، لدرجة أنه كان كايبدا يكلاشي فالرجا وجمهورها غير باش يكسب تعاطف الوداديين ويبان أنه عندو مساندين حيث فالمحمدية كانو عايقين به ما فيدوش، وطبعا ملي جا للوداد بعدما تسنى حتى طاح رئيسها التاريخي سعيد الناصيري فالمشكل اللي عندو قدام القضاء، بان الفشل ديالو وبان أنه غير داوي خاوي وبداوي برو ماكس، وجاي غير باش يركب على نجاحات الناصيري الكبيرة اللي حققها للوداد.