الزيات لـ”گود”: الرجا داخلة للتاريخ وغانرجعوها مع 3 أحسن أندية إفريقيا والطوب فلافريك

كود سبور//

عبر جواد الزيات الرئيس الجديد للرجاء الرياضي على الفرحة ديالو بالفوز بالانتخابات الرئاسية للنادي، بعدما تفوق فالجمع العام ليلة الاثنين- الثلاثاء، على كل من الرئيس المؤقت عبد الله ببرواين والرئيس الأسبق سعيد حسبان، وقدر يرجع يترأس النادي مرة اخرى بعد مرحلة سابقة، ووعد الرجاويين أنه غايرجع الخضرا للطوب أفريقيا مع مشروع الشركة الرياضية.

وسول جورنال “گود” جواد الزيات على مستقبل الرجاء الرياضي بعدما طلع رئيس وقال: “عندنا وقفة تاريخيّة وغانكونو من الفرق الكبرى فالمغرب اللي غايتحولو من التسيير الجمعوي إلى التسيير على شكل شركة، والمستثمر اللي قبل يدخل معنا فهاد التجربة (مرسى ماروك) مشكور، غايمكن يجيب لنا السيولة المالية، وطريقة التسيير ديال الشركات اللي هي مهمة، حيث اللي كانشوفو اليوم فهاد الجمع العام دوزنا ساعتين وحنا كانهضرو على التقرير المالي اللي كانوا فيه بعض الأسئلة وبعض النقاط إلى اخره،  وخاصنا نتفاداو فالمستقبل هاد النقاط ويكون عندنا تسيير عقلاني بواحد الطاقم إداري اللي كايكون كايسير الشركة اللي غايكون فالمستوى العالي وغايخلينا نحيدو هاد المشاكل القانونية ومشاكل النزاعات والمشاكل المالية باش نركزو على الرياضة، والهدف ديالنا هو نكونو فالقريب العاجل مع الثلاثة الاولين أفريقيا وفالبوديوم وباش نديرو هذا الشي خاص تكون عندنا إيكيب صحيحة وطاقم تقني يكون صحيح ومدير رياضي وواحد الهيكلة وما كانهضروش غير على الأشخاص لكن خاص تكون عندنا هيكلة اللي تخلينا نمشيو للقدام.”..

وكمل الرئيس الجديد للرجا وقال: “الرجا نادي عندو جميع الإمكانيات اللي تخليه يمشي بعيد وخاصنا بالفعل نعرفو ندبرو المرحلة ومعنا مستثمر فالمستوى العالي وخاصنا نديرو اليد فاليد معه ونزيدو للقدام، وواعدت المنخرطين باش نشاركهم فهاد المرحلة الجديدة باجتماعات كثيرة ونجيب اكبر عدد من المنخرطين يلتحقو بنا فاللجان سوا على صعيد الجمعية او الشركة الرياضية، ولا خوف على مستقل الرجا، فريقنا ديما كان فالقمة وغايرجع للقمة وهدفنا توفير الاستقرار المالي الصحيح اللي يخلينا  نبقاو ديما فالطوب”.