آدم أزنو غايرجع يلعب فالصبليون حيث ما لقاش بلاصتو مع بايرن ميونخ

كود سبور//

من المنتظر يرجع الدولي المغربي الشاب آدم أزنو يلعب فالصبليون حيث ما لقاش بلاصتو مع بايرن ميونخ الألماني.

وكشفت جريدة “AS” الإسبانية، أن آدم أزنو، الظهير الأيسر لبايرن ميونخ، اللي لعب الموسم الماضي على سبيل الإعارة مع بلد الوليد الإسباني لمدة 6 أشهر، غيرجع يلعب فالصبليون، وهذه المرة مع خيتافي.

نفس المصدر قال إن خيتافي كايوجدو للإعلان على صفقة آدم أزنو، وأن رئيس خيتافي لمح لهذا الشي فتصريح له البارح الثلاثاء، وقال بلي مهتمين بلاعب كان مع بلد الوليد الموسم الماضي.

ويعتبر آدم أزنو مول 19 عام، منتوج ديال أكاديمية لاماسيا ديال البارصا، وخرج من برشلونة لعند بايرن ميونخ وكايحاول يلقى فرص فين يلعب، ومشى بريطي الموسم الماضي لمدة 6 أشهر لبلد الوليد الإسباني ورجع سافر مع بايرن ميونخ لمونديال الأندية وبقى فالاحتياط، مع العلم أنه فضل يلعب مع المغرب على اسبانيا، وهو صاحب لامين يامال نجم البارصا وكبرو بجوج.